اسمراني 2024

زوووووولة تفتح الروح ضلفتين تخشك تمرقك بل تساسق بين شفقتك وحرقتك عادى تخشك تمرقك ما بتأذنك ما روحها نفاج غربتك هذه البنية الساكنة اسرار فكرتك هى الشايلة حسك وسترتك زووووووووووووووولة كالنورس تجى تنزل شواطى الالفة والزمن الشفيف وانا ذى مكتف فى الرصيف مربوط على حبل السفن فى الضلمة والليل المخيف بتجينى تدخلنى وتقيف شرشرته تيبان السكات على ارض رويانة وخريف زولة بتعرف تدخلك وتقفلك وتغـــــــفلك تقعد على ناصية هواك وتشغلك وانت بتحنس غمام عشان تجعلك مطرة ودعاش داير تحلق فى السما ء وارضك فراش هذا الفراش بطير على نضرة رحيقا وخضرتا ومحبتا اومشيتا ومحنتا او ضحكتا وسخريتا وتقعد تهضرب يا ولد من حمتا ولو تسألك وتحلّفك فى ذمتك الى متى هذا الجنون والى متى كل التفاصيل لمتة هذه البنية قد اتت وانت ذاتك كل الورق من ذكرياتك تنجو وين وين مهربك من دفترك من مصدرك من مظهرك من جوهرك من حرقة الجوف والعرق هذه البنية تفتح الروح ضلفتين وعلى ضفتين فى نهر احزان الزمن تقعد تلوح باليدين زووووووووووولة تخشك تمرقك ما بتأذنك ما روحها نفاج غربتك هذه البنية الساكنة اسرار فكرتك هى الشايلة حســــــــــــــــك وسترتك.