Memooy

الحياه مش بتاخدك من الناس ال بتحبهم انت ال بتختار تبعد عنهم انت ال بتختار هتكون ايه ف حياتهم مش الحياه ال بتختارلك. طالما المحبه متبادله يبقي ف ايدك تكون الاقرب و ف ايدك تكون بعيد و كله بإختيارك أنت. الحياه مش بتجبر حد علي حاجه هو يقدر يختار فيها ،، لما تبقي عايش و حد يخيرك بين مثلا صاحبك ولا الفلوس الحياه ملهاش دخل ف ده انت ال بتنطق بالكلام بإختيارك ده و بتتحمل عواقب اختيارك بعدين. انت تقدر تختار تفضل مع حبايبك ما تسيبهمش طول ما هما عايشين لكن الحياه و الدنيا عموماً ملهاش دخل والزمن ملهوش دخل ف علاقتك بالناس. عشان اوضح نوع الموضوع اكتر هحكيلكوا عن مثال سريع. فيه واحده علي سبيل المثال انا وهي كنا صحاب لحد فتره معينه ،، البنت دي حالياً بإستمرار بتقول انا معنديش صحاب ،، و بإستمرار تنزل بوستات طويله اوي عن الصحاب و الصاحب الوفي و انها معملتش صاحب طول عمرها و بتكبر و هي لوحدها. للأسف انا كنت اقرب صاحبه ليها و بعدي ب فتره بقي عندها صاحبه غيري قريبه ليها اوي و الصاحبه دي سابتها بردو. فحالياً هي ف الفتره الصعبه الوحيده ف حياتها ال بتعدي بيها لوحدها ف الفترات الصعبه ال فاتت كنت انا بكون معاها و جنبها و بعد مني كانت صاحبتها التانيه . بس دايما بتضايق انها مفكرتش تسأل نفسها انا ليه معنديش صحاب ؟ او تتناقش كده مع نفسها جايز توصل للمشكله ال فيها هي بتخلي الناس ال بيحبوها يبعدوا عنها. بس انا لما بقرأ كل بوست ليها ببقي عايزه بحكم العشره ادخل و اسأل عليها و بمنع نفسي من ده كل مره ،، طيب ليه انا بعمل كده بردو؟ عشان انا عملتها مره و كان رد الفعل قليل الذوق. و سبب بعدي عنها و متأكده انه هو نفس سبب بعد البنت التانيه عنها انها شخصية بطبعها قليلة ذوق و عمرها ما عرفت يعني ايه يكون عندها ذوق تجاه اي شخص قدامها ابداً ،، او مثلاً تقدير ليه او لما يزعل تحسسه انها بتحبه و متمسكه بوجوده مش يلا ف داهيه. ده غير إن المشكله الاكبر ف طبعها انها ملهاش عزيز حقيقي زي ما هي فاكره ان ال بتحبهم بيمشوا ،، هي بنفسها ال بتقول للشخص ال قدامها لو عايز تمشي يلا مع الف سلامه. و بترجع تقول انا محدش معايا. لإن هي شخصيه عندها قدره غريبه علي التخطي و سرعه مش طبيعيه علي الاستبدال و بتعيش حياتها كده كل الناس عندها شبه بعض و كل المقامات واحده و تقدر تبدل وجود دي ب دي عادي . يمكن دي حقيقي أصعب شخصيه انا عديت عليها ف حياتي و وجودها و غيابها بالنسبالي مكانش سهل كده زي ما هو كان سهل معاها و عمري ما عرفت احط بدالها حد جديد ولا بفكر اعمل كده. ال عايزه اقوله بإختصار شديد الزمن بيغير البني آدم.. اه بيغيره كتير حقيقي . لكن الحياه ملهاش دخل ف بعدنا احنا عن الناس و بعد الناس عننا ،، طرف مننا هو ال بيختار البُعد ده بنفسه و بإرادته. فكروا كويس اوي ف عيوبكوا عشان تحسنوا علاقاتكوا بعدين و دي حاجه انا بحب أعملها وبيها بقيت احسن. بس كده ♥️