. بهجت

شايف إن الحياة ناقصة بدون الأنثى وكذلك بالنسبة للأنثى محتاجة راجل. الزواج بمنتهي البساطة هو سكن ولبنة تكون المجتمع. السكن هو السكن المعنوي إنك تلاقي حد يشاركك حياتك كلها. هيكون أقرب شخص ليك. هيبقوا تقريبا حاجة واحدة بتكملوا بعض. سيدتنا حواء خلقها الله من ضلع سيدنا آدم عليه وعلى نبينا أفضل الصلاة والسلام فتبقى هي جزء منه. بعد فترة معينة كل واحد بيبحث عن الطرف الآخر اللي من غيره تبقى الحياة حاسس فيها حاجة ناقصة. وزي كتير من الحاجات في الدنيا الحاجة اللي فيها متعة باردو فيها مصاعب والحياة فيها مصاعب. السؤال بقى امتى الراجل والست يبقوا متوائمين مع بعض بحيث إن شاء الله اي مصاعب يعدوها سوا بسهولة ويسر. إنهم يبقوا سند لبعض ويبقوا فاهمين إن الحب مش مشاعر وبس لكنه فن بييجي من إن كل طرف بيبذل مجهود عشان يبقى فعلا هو احلى حاجة في حياة الطرف الآخر. انا اللي نفسي فيه إن إن شاء الله زوجتي تقول إن احلى حاجة في حياتها هو انا وانا اقول احلى حاجة في حياتي هي زوجتي. ومعروف إن خير متاع الدنيا الزوجة والزوج الصالح. وهنا يبقى الحب زي الشجرة بتسقيها كل يوم بالإهتمام بالطرف الآخر والاستماع ليه وتقديره ومداعبته وإنك تحاول تفهم نصفك التاني. يكفي إن ربنا جعل التكامل في علاقة الزواج فمن أعطي للزواج حقه يمكن يبقى عايش فعلا الحياة اللي ربنا عايزها ليه. دي الفطرة. كل طرف بينجذب للطرف الآخر. وعشان الزواج هو لبنة المجتمع عشان إن شاء الله يطلعوا جيل صالح يبقى محتاج الزوجين يبقوا عندهم وعي بالزمن اللي هم عايشين فيه. إزاي يطلعوا جيل صالح يبقى هدية للمجتمع وهدية ليهم بعد موتهم. "وولد صالح يدعو له" وطبعا لإن العلاقة قائمة عالحب والإحترام فمهم جدا إنك تسأل عن دين الطرف الآخر. لو الطرف الآخر غير مهتم بعلاقته مع اللي خلقه هل تظن هيتم بيك؟ الراجل محتاج الست اللي تدعمه وتبقى سكنه بجد. الشخص اللي بيحب يفضفض معاه ويحكيله. هو اعز شخص في حياته. والست محتاجة راجل يحتويها راجل بجد يعتمد عليه واد المسئولية ومتدين وبيخاف ربنا. فكل اللي طلبه هو زوجة صالحة متدينة محجبة وواعية إنى اعتمد عليها إن شاء الله في إنشاء جيل صالح. فالأم مدرسة. ويقال وراء كل رجل عظيم امرأة. اما عن نفسي فالحمد لله متفائل وبحاول استغل وقتي في المفيد زي التعلم ومساعدة الناس. بحب شغلي وبفضل الله بحاول اطور نفسي فيه دايما. مهتم بصحتي وبلعب رياضة بشكل دوري ومحافظ على طبيعة اكلي وهكذا بحب القراءة وسماع الكتب الصوتية في الدين وتطوير النفس والبزنس والإدارة وعلم النفس وفي تخصصي وربنا يرزق كل واحد الشخص الأنسب له اللي يكون من أسباب سعادته دنيا وآخرة.