الجواز علينا حق

انسانة طبيعية .الانسان الطبيعى فيه كل حاجة وعكسها . فيه الحلو والوحش . بس يكون الوحش بتاعها استحمله واعرف اتاقلم عليه . بلاش الوحش اللى يطهق ويخرج الواحد من هدومه وبيته ويخليه يجرى فى الشوارع حافى .يعنى مش هاستحمل وحاشتها لو بخيلة او مش مطيعة او مش اصيلة او كئيبة او قليلة الادب مثلا واكيد مش هاستحمل وحشاتها لو مش نضيفة او لسانها طويل او ايديها طويلة او ماتعرفش تربى اولاد او تكون قاسية او ماعندهاش عزيز او تكون مثلا شكاكة او غدارة او مش متزنة .. باختصار تبقى حد كويس من جواها . حد نقى وابيض طبيعى مش نقاء برسيل .حد بيعرف يحتوى اللى قدامه حتى لو بالصمت مش تاكلنى برغيف عيش او تاكلنى بالكلام .حد يكون كدا عارفين حنية الام على ضناها مش حنية قطونيل .حد يكون زى الدوا اللى تحب تاخده وانت عيان مش عشان تخف لاء عشان تعيش . حد يصبرك على اللى ناقصك ومش يعايرك بتقصيرك ويعذرك عشان دا اللى فى ايدك . حد ما تقلقش منه تقوله على غلطك وعيوبك وماتخافش عليه من غيابك بس يوحشك وتقلق عليه مش منه .. حد مايبقاش عبئ عليك ولا على اهلك . حد يشيل معاك عشان تشيله هو واللى شايله معاك على راسك من فوق . حد يخليك تتكلم لا ارادى مش تتكلم تقضية واجب ولا سد خانة .حد شبهك ومنك حتى لو مختلف فى حاجات عنك . حد يخليك تحب تاكل اكله حتى لو شبه اكل مرعى بتاع كبدة الحمير اللى اتمسك من سنة ..حد تحب تشم ريحته مش عشان حاطط عطر ولا مستحمى بصابونة دووف وجاى يتنطط عليك... عشان خلاك مدمن النفس اللى بيتنفسه .. حتى لو هاتتمسك قضية بنفسه دا وتتسجن .. حد يخليك مميز مش عشان البلكونة مترتبة ولا عشان الغسيل منشور بنظام ولا عشان قدام الشقة والسلم متروقين .لاءءء .. مميز عشان بملكيتك ليه بتمتلك حاجة مش مع حد تانى .. حد يخلى الدنيا كلها تبقى ضدك لما تزعله مش عشان واخد فلوس منهم وهربان ولا داخلة جمعية مع الحى كله ومابتتدفعش .. لاءءء .. عشان حاسين انك غبى انك بتزعله ...وتبقى انسانة وانثى طبيعية من غير ميك اب داخلى او خارجى ......لان اى عيوب خارجية سهل نغيرها او نتاقلم عليها او حتى نحبها زى ما هى كدا .. انما عيوب النفس والروح مالهاش علاج غير المعجزات... انا زهقت من الرغى وفى الاخر عارف والله هاتيجى حد عكس كل اللى قولته انا عارف وربنا انى مبتلى يا اما منحوس ..... عوضى عليك يارب