Kuwaiti Citizen

شابة لطيفه .. صبورة إلى حد ما .. وخدومه وأتحمل المسؤولية اللي أكون مكلفة بها .. مطيعه عفوية وعفويتي ساعات تجرح من حولي , يقولون إني خفيفة دم يمكن من السمنه ! لكن الله أعلم .. بنت حمولة أصيله ومتدينه.. سنية حضريه .. سمينه لدي وزن زائد كثيرا بس مو مدربحه ولله الحمد .. صج إني سمينه بس اللي يشوفني ما يعطيني هالوزن أبداً.. يقول أقل بوايد يمكن علشان ماخذني طول الحمد لله ويمكن علشان إني نشيطه بالحركه ومشيتي متوازنه ولله الحمد والمنه .وإن شاء الله أصير رشيقة بصحة وعافيه عن قريب ..! يقـال عني جميلة وذات وجه طفولي بريء .. أنا خجوله جدا في الوقت المناسب وجريئة في الوقت المناسب ! .. وأحب الأطفال جدا جدا .. و محبوبه من الأطفال بشكل خاص و ما أقدر أقول كل الناس تحبني لأنه هذا مستحيل .. بس اللي يعرفني عدل , بسرعه أدخل قلبه ,, والله أعلم .. أحب أقول كلام حلو وأسمع الكلام الحلو بالمقابل ! ..هذا بإختصار .. والمزيد لاحقا لأني ما أقدر أزكي نفسي لقوله تعالى " فلا تزكوا أنفسكم هو أعلم بمن إتقى".. أقدر أقول عيوبي : أنا غيوره على اللي أحبهم ... بالذات إذا كان زوجي .. بس الحمد لله مو غيره شديده ,في ناس تعتبرها ميزه وناس العكس ..أنا ما أحب السوق ولا أروح له كثير ولا أشتري دايما بس إذا رحت أسرف نوعا ما وبالذات حق غيري واليهال خاصة ً أحب أشتري لهم .. يمكن لأني حاليا ما عندي مسئوولية كبيره من بيت وزوج ويهال .. بس الأكيد إني راح أتغير وايد لما أتزوج .. ومن عيوبي أيضا .. إني ساعات أعاند مع اللي يعند معاي !! وساعات بعد يضطر غيري إنه يسمّعني نفس الحجي أكثر من مره ولو مو بنفس الطريقه والتعبير بس والله والله مو دايما .. قليل يصير هالشيء ! يارب الله يهديني وأصير أفضل وأصلح مما أنا عليه .. ذكرت شغله : أنا دراستي دبلوم مو جامعيه بس مدري اشفيه الموقع ما عنده الا دراسه جامعيه .. ونسيت أقول إني أحب العلم الشرعي جدا.. وناويه أتعلم أكثر مع زوجي إن الله كتب لي نصيب وتزوجت إنسان صالح يحب اللي الله يحبه ويرضى في اللي الله يأمر فيه .. على فكره أنا متغطيه أسود بأسود يعني ما يبين مني شيء ! يعني ما أقبل على نفسي أحد يشوفني في مكان غير بيت أهلي (ما عندنا حاور زاور ) ! أنا حبيت أكون صادقه وما أغش علشان غيري ما يغشني ويصدق معاي ..ملاحظة هامة جدا : لن أقبل بأي شكل من الأشكال المراسلة عن طريق الإيميل أو الهاتف أو أي طريقة أخرى غير هذا الموقع فقط إلى أن يشاء الله ويتم التوافق, وأي رسالة فيها شيء من هالنوع فسيتم تجاهلها وحذفها تلقائيا.. أنا جادة جدا .. والله يوفق الجميع لما يحبه ويرضاه .