Osha1

الاهتمام و الاحترام بالنسبالى فى المقام الاول من غيرهم يبقى مفيش اساس تبنى بيه اى علاقة ، من غير احترام مفيش اهتمام و مفيش حب و انا مش زى بقيت المصرين الاهتمام بالنسبالى مش اكلة حلوة و لا غسيل ولا نظافة بيت ، هو طبعا كل دى حاجات مهمة بس ماتصلحش انها تبقى معايير نقيس بيها اهتمام الشخص اللى قدمانا اذا كان بيهتم بينا ولا لأ، ده غير انها كلها حاجات انا كراجل اقدر اقدمها لنفسي ، انا عايز اللى مقدرش اعمله ولا اقدمه لنفسي حاجات زى الاحتواء ، حنية ، دعم ،،، مؤمن جدا ان مفيش حد مفيهوش عيوب المهم اننا نقدر نتقبل بعض بعيوبنا و ده محتاج مننا احنا الاتنين جرأة كبيرة علشان كل واحد فينا يكون واضح وصريح مع التانى من البداية ويكون فيه مصارحة و مكاشفة لكل عيوب الطرفين وكل واحد وقتها له حرية انه يقرر اذا كانت عيوب الطرف التانى هايقدر يتأقلم معاها و يكمل ولا مش فى مقدرته انه يتحملها ، الأوقات الحلوة بنلاقى جنبنا الناس اللى احنا بنحبهم لكن فى الاوقات الصعبة مش هتلاقى جنبك غير الناس اللى بتحبك بس ،الحياة صعبة بما فيه الكفاية فبلاش نكون مصدر ازعاج و قلق و توتر لبعض ،متدورش على حد شبهك علشان مش هتلاقى دور على حد عنده نفس الثوابت و المبادئ اللى عندك لكن الطباع و الاهتمامات مش لازم نتطابق فيها، الطباع علينا اننا اما نتقبلها زى ماهى او اننا ننسحب للابد لان مفيش حد بغير طباعه مهما حاولت اما بالنسبة للاهتمامات ممكن جدا نشاركها مع بعض نخلق منها زكريات حلوة لينا