امتي هنتلاقي

شوفى يا ستى انا لا دكتور ولا ظابط ولا مهندس ولا حتي خريج المعهد العالي للعزف تحت الماء انا محاسب خريج كلية تجارة زى ٪40 من المصريين المهم اتخرجت ودخلت الجيش وخلصت واخدت بعد كدا كورس سنه علي القهوة وكنت قربت ابقي شريك فى القهوة وضع يد لأنى كنت بقعد عليها اكتر من بيتنا المهم الوالد الله يرحمه ضيع عليا الفرصه وكلم واحد صاحبه برضه الله يرحمه كان بيشتغل بره وجابلى شغل وسافرت اشتغلت 3 سنين وبدأت الحاجه الله يرحمها تقولى عاوزين نفرح بيك وتقريبا كانوا عاوزين يعزموا العيله علي العشا قالوا بالمره نجوز الواد المهم نزلت اجازة واتجوزت جواز صالونات واخدت شقه فى ارقي حته فى مصر وقتها المرج 😂😂😂وقعدت شهر فيها واخدت العروسه وسافرت قعدنا 5 سنين ونزلنا اخدنا شقة فى مدينة نصر وبعت شقة المرج وانا ببكى المهم محصلش نصيب فى الانجاب بعد سنتين تانى قررنا الانفصال وانا كملت فى شغلى وهي نزلت مصر وإن شاء الله يكون ربنا وفقها مع حد احسن منى ويكون ربنا كرمها بأولاد وفضلت مكمل بره والشركة اللى انا فيها فتحت فرع فى مصر ونزلت اكمل شغل فيها من سنه وطبعا اول ما نزلت كنت مع اخواتى واصحابى بعوض جزء من اللى فتنى معاهم لكن بعد فترة كل واحد الدنيا خدته وبقيت لوحدى وطبعا فكرت فى الجواز وقولت التوكل علي الله وأشوف عروسه طولت عليكوا معلش الوحده وحشه وابتديت اكلم نفسى وساعات بكلم الدولاب وامبارح رد عليا 😂😂ربنا يسهل والاقيها هنا