Khaled.Rayan

السلام عليكم ورحمة الله وبركاته، حابب أكتب شوية تفاصيل تعريفية عن نفسي. أنا بحب أسمع للشيوخ زي محمد حسين يعقوب، سمير مصطفى، ومحمد الغليظ، وغيرهم من الشيوخ على نفس الفكر. وبشكل عام، عندي خطط أبدأ أتعلم العلم الشرعي بإذن الله، بس حاليًا مش مشترك في أي دورة. لكن الحمد لله بحفظ القرآن وبتعلم تفسيره. مبحبش أسمع أغاني أو أشوف أفلام ومسلسلات. كان فيه فترة في حياتي كنت بعمل كده، بس الحمد لله بطلت، وعايز شريكة حياتي تكون على نفس المبدأ. بالنسبة لي، أكيد كل واحد فينا عنده قصور، وده شيء طبيعي. لكن أهم حاجة عندي في زوجتي وفي نفسي هي إننا نكون دايمًا مستعدين نراجع نفسنا، سواء في حاجة في طبعنا مش مريحة لبعض، أو حاجة بنعملها مخالفة للشرع، أو حتى حاجة الطرف التاني مش بيحبها. المهم إن يبقى عندنا دايمًا استعداد نراجع نفسنا عشان نحاول نرضي بعض، خاصة لو فيه ملاحظات متبادلة بينا. وفي الحياة بشكل عام، نخلي مرجعيتنا الأولى هي الشرع ونسعي ديما نخلي حياتنا متوافقة معاه. يعني لو لقينا نفسنا بنعمل حاجة غلط، نقدر نراجع نفسنا ونتراجع عنها بسهولة، ودايمًا نكون مستعدين نحسّن من نفسنا عشان نوصل لأحسن نسخة من نفسنا، سواء لنفسنا أو لزوجنا-زوجتنا. وده ممكن نختصره في إن الطرفين ميبقاش عندهم عند أو كبر، ويكونوا فاهمين يعني إيه زواج في الإسلام ويعني إيه بيت مسلم. أنا شخص بيحب النقاشات والمشاركة جدًا في وجهات النظر والتعاون، ودايمًا بحب قراراتي تكون بالمشاركة، عشان الطريق اللي الزوج والزوجة بيمشوه مع بعض لازم يبقوا راضيين عنه سوا. لكن أكيد دايمًا فيه اختلافات في وجهات النظر بتحصل، وأنا بحب وأقدّر اللي بتكون عارفة إن في حالة لو الموضوع مش قادرين نوصل فيه لحل وسط، فالطاعة بتكون للزوج. بشكل عام، أنا شخص سياسي ومش متطرف لأي فكر معين طالما بعيد عن الحرام والحلال، لكن يهمني فكرة الطاعة نفسها ميبقاش فيها كبر. أنا خريج حاسبات ومعلومات، وشغال حاليًا. المستوى المادي بيختلف تصنيفه من شخص للتاني، لكن الحمد لله بالنسبه لعمري أقدر أقول إنه على الأقل متوسط. بالنسبة للشغل، أنا بفضل إن الزوجة تكون ربة منزل لأسباب كتير، بس لو بتشتغل، يفضل بيئة مفهاش اختلاط بالرجال، ولو فيها، تكون عارفة ضوابط الاختلاط، سواء في الشغل أو مع شباب العيلة أو أي رجل غريب. ده كل اللي حابب أقوله كبداية. أكيد فيه تفاصيل تانية حابب أشاركها، بس كمبدأ أعتقد لو توافقنا في اللي فوق، باقي التفاصيل هتكون تكاملية.