احتواء و عفة

في ناس بتدخل الجواز لمجرد إنها عايزة تغيّر حاجة في حياتها، أو تحقق هدف كانت بتدور عليه؛ أمان مادي، سفر، مستوى معيشة أفضل، أو حتى حياة تتخيل إنها هتكون مُرضية ليها ولأولادها. لكن لما يكون الاختيار مبني على الاحتياج أكتر من القناعة، ممكن مع الوقت يتحول لتحقيقٍ مؤقت إلى ندم طويل… والندم لما يتكرر، بيبدأ يسيب أثره على التصرفات والمشاعر، وعلى العلاقة نفسها، وأحيانًا بيمتد للأطفال اللي كانوا في الأساس جزء من الحلم. علشان كده، أنا مش بدوّر على «جوازة وخلاص»… ولا على حد يكمل شكل اجتماعي أو يحقق معايا أهداف معينة. أنا محتاج وليفة. واحدة تكون زوجتي، وفي نفس الوقت تكون أماني وحناني، صاحبتي اللي أحكيلها كل حاجة، وعشيقتي اللي أفضل أشوفها بعين الراجل اللي اختارها، وأختي اللي أرتاح معاها، وبنتي اللي أخاف عليها وأدلعها، وأمي بالحنان اللي أرجع له لما الدنيا تتقل عليّا… وتكون، قبل كل ده وبعده، توأم روحي. وأنا كمان أكون ليها النص التاني من كل ده؛ زوجها وحبيبها، صاحبها وسندها، أمانها وراحتها، والراجل اللي تقدر تكون معاه على طبيعتها من غير ما تخاف من حكم أو تخبي ضعف. أنا مش عايز مجرد شريكة حياة… أنا عايز إنسانة نبقى لبعض حياة كاملة؛ كل واحد فينا يلاقي في التاني أكتر من دور، وأكتر من سبب للاستمرار، وأهم من كل ده… يلاقي وطنه.