تلك الايام@

مواصفات شريكة الحياة اللي بدوَّر عليها ❤️ مش بطلب المستحيل ، بس نفسي ألاقي اللي لما ابصلها أحس إن الدنيا لسه بخير، وإن الضهر اتسند والبال ارتاح. بنت أصول: متربية تربية أهل، مش لازم تكون من عيلة كبيرة، بس يكون عندها أصل، تبوس إيد أمها وتحترم أبوها، وتعرف تقول "حاضر" من قلبها مش من مناخيرها. عقلها راجح: مش بتقلب على كل كلمة، ولا بتخلي الحاجة الصغيرة حفلة دراما… عندها كده ذكاء أنثوي تعرف تلمّ الدنيا وهي ساكتة، وتخلّي الواحد يراجع نفسه من غير ما تعلي صوتها. دمها خفيف : تضحك من قلبها، وتضحكني من قلبي… نرمي همومنا في الأرض ونهزر عليها. تبقى فاهمة إن الحياة مش كلها جد، وإن الضحكة الحلوة ساعات بتعمل أكتر من ألف نصيحة. شكلها؟ … مش بدور على ملكة جمال،مش بهتم بالمقاييس، أهم حاجة تبقى مريحة لعيني، وحلوة في عين نفسها. تحبني وأنا على طبيعتي: مش عاوز أبقى في تمثيلية طول الوقت… أبقى على راحتي معاها، وأنام وأنا مطمن إن اللي جنبي شيفاني سند وامان لها ، مش اكون بالنسبالها مشروع بيت أو فستان فرح. تحب البيت بس مش حابسة نفسها فيه: تبقى ست بيت لما البيت ينادي، وشريكة كفاح لما الطموح يشاور. تفتحلي بابها وباب عقلها. تحب البيت يعنى بتحب البيت وتعرف تسنده، وفي نفس الوقت عندها طموح، عاوزها تقولي “عاوزة أحقق حاجة” مش “استناني لسه بتفرج على المسلسل”. تبقى صديقة واخت قبل ما تكون زوجة، نقدر نرغي في أي حاجة من غير ما نحس بملل… من السياسة للكشري! مش كاملة، بس صادقة: عادي، نختلف… نزعل… بس نرجع لبعض لأن ما ينفعش نكمل من غير بعض.