اللهم سند.

أن يتقي الله في ويكون واضح وصريح أنا نفسى أتجوز راجل عادى - يعنى إيه عادى؟ يعنى عادى... مش نرجسى ومش عنده fear of commitment . ومش بتاع ستات ولا مدمن شغل. ولا ابن أمه ولا راجل متسلط بيضرب ويهين. راجل عادى أتونس بيه وأتسند عليه وأبقى متأكدة إنى مالية عينيه، انا نفسى أقابل راجل عادى. راجل أبقى شايفة حبه ليا فى ريحة الفاكهة جوا الأكياس اللى داخل بيها عليا وهو راجع من شغله. فى كوباية شاى عملهالى وهو بيعمل لنفسه، فى ترتيبه سرير فى يوم عادى جدا. راجل ينادينى ويحلف عليا أسيب اللى فى إيدى وآجى اتفرج على مشهدى المفضل فى مدرسة المشاغبين. راجل مابيكتبش أشعار فيا ع الفيس بوك. ولا لازم يكون حلمه نصيف فى المالديف. بس يكون زعله عادى ورضاه عادى برضو راجل مش صعب مش مجهد. راجل ابص له كل يوم وهو نايم جنبى على المخدة واقول حسه فى الدنيا كفاية. راجل كل مرة تتلاقى عيوننا أشوف فيها إنى ست حلوة. راجل حاططنى فى حساباته وخططه، وأحلامه. راجل عادى العادية أحيانا كتير بتكون أمر رائع ونادر جدًا. لأن معناها إن الحمد لله مفيش حاجة توجع ولا تخوف. فيارب أحبة عاديون يحبوننا بطريقة عادية.