نظرة مؤمن ...

لي حبت دير معايا بيت في طاعة رب العالمين ، أنا هذه هي ظروفي ما عندي ما نخبي عليك يا بنت الناس ما غذوة تعايريني و تقولي ياولد الناس راك كذبت عليا و غشيتني ، أنا الله يبارك فيك من عين تموشنت ، عمري 42 سنة أعزب ، خدمة ما عنديش حاليا قريت و بديبلومي و كل شيء و لاكن ما عندي زهر ، سعيت سعيت ولاكن هذاك حد جهدي ، مين نكون محظوظ و يساعفني الحظ نلقى ديك كونترا نخدم دوك شهورا زوج ولا ثلاثة مع بريفي و لما تخلاص نجمع نقعد بلا عمل ، لما توفى والدي ربي يرحمو في كورنا حسيت حياتي زادت تعقدت أكثر ، الله غالب مافينا نعاتبو القدر ، فرغت علينا الدار و بقيت عايش غير أنا و الوالدة نتاعي فالبيت ، خواتاتي زوج متزوجات و بديارهم و أطفالهم يجو غير في مناسبات ، الوالدة نتاعي ولات ضل لوحدها في البيت ولات تشفني المسكينة ، بقاو خواتاتي يخطبولي يشوفولي في نسا ، قالولي نعاونوك شويا شويا و دير عرس تاع مساكين على حسابك و تزوج و عمر على ميمتك الدار ما تقعدتش هكذا راك كبير ، ولا مرا قبلت بيا ، غير لي يسألوها تقولهم انا ما نديش خوكم بلا خدمة ما يخدمش ما عندي ما ندير بيه ، إحترت و حسيت روحي كديك معزة لي فيها ولسيسة في وذنيها و عافوها شرايا و نباعت في سوق ، نسيت الموضوع و قلت معليش هاد الفرحة لي طال إنتظارها و ما حبت تأتي ربما وراءها سر و عسى رب العالمين مخبيلنا الأفضل ، قلت نكتب رسالة و نرميها في انترنت دنيا كبيرة و ظروفها مختلفة و كلام القلب يوصل للقلب ، يمكن رب العالمين يصادفني بمرأءة أقرب إلى قلبي رحمة ، فالله إسمه ............. الرحمن الرحيم 🤲