احمد رمضان_

عندي 26 سنة وبشتغل الحمدلله وشكلي عادي شبه كل الناس -مقبول يعني- وماتجوزتش لحد دلوقتي! اللي انا هاقوله ده مش خيال ولاكلام مثالي، أنا هاقول اللي انا حاسس بيه ومصدّقه وبيدور جوايا، مستعد اعمل كل حاجه في وجود انسانة بس أبقى شايفها شريكتي وصديقتي، مشكلتي مع الجواز مش اني اقبل حد، مشكلتي ان حد يقبلني، اني ماكونش شخص مزعج ولا ظالم ولا أناني، اني اكون جدير بالحكاية كلها لإنها أكبر مسئولية على وجه الأرض، حد تفهمه تكلمه تسمعه تسكُتله تصدقه تثق فيه وتديله مساحته وتاخد منه مساحتك في غلاف غير مرئي من الود والرحمة وأشياء أخرى، فـ انا مش باقول كلام والسلام أنا بجد باحس تجاه نفسي اني استحق اكون سعيد ومتفاهم ومفهوم، باشوف ان لنفسي عليا حق الانتظار والتفكير موضوع الجواز ده حوار مش سهل ومش أي حد يقدر يحدد هو عاوز ايه منه تحديداً، ودي أكبر اشكالية ف العلاقات ف رأيي ان الناس يا اما مش عارفين بيتجوزوا ليه فبيتجوزوا عشان المفروض يتجوزوا، او بيتجوزوا عشان ده احسن الموجود، او بيتجوزوا وهما حاسين ان كان فيه احسن.. الخ الخ، انا بقى مش عاوز غير صديقه أبدية وشخص مختلف بجد واختلافه كامن ف انه بيفهمني وبيعرف قصدي بدون ما امثّل ولا اكذب ولا ابرر ولا ابذل مجهود، فـ ياكده ياسنجل للأبد، يلا على الله التساهيل 🤝