حسام الدين.حسن

ربنا يكتب الفيهو الخيريظل عام 2023 بيقدم لي نهايات كبيرة و متتالية. وأظل انا رغم كل الانهيارات اللي بتحصل حولي و جواي شخص بيحاول قدر الامكان يفتش عن النقطة او المكان الهادي و ينتظر فيه الى ان تمر النهاية. نهاية جديدة وضعتها اليوم من موقف بسيط جدا، لكن بالنسبة لي كان كافي عشان أفهم انه دي نهاية واضحة. أحيانا بنحتاج المواقف البسيطة دي عشان نخت نهايات اجلناها كتير او اتجاهلناها. لما تحاول كتير ، لما تحاول محاولات عظيمة بالنسبة ليك وتكون نتايجها -صفرية-، م ح تستغرب لما تكون نفس النتيجة من محاولة بسيطة شديد. ح تلقى انه مشاعرك تجاه الحاجة دي بقت غير موجودة. ف ببساطة ح تخت نقطة النهاية. عشان تبدأ تعيش مرحلة مع بعد النهاية. سواء كانت أسف أو حزن او حتى عُزلة تجمع فيها نفسك. مرات بنحتاج دعم الناس اللي واثقين فيهم يساعدونا ، مش اللي بنحبهم. ممكن تكون بتحب صاحبك او صديقك، بس كمان ممكن تكون واعي انه صديقك دا ما هو الشخص المناسب عشان يدعمك او يساعدك في الحتة دي بالزات خاصة لو كنت شخص قوي و شخص واعي اغلب الوقت. ممكن الشخص دا يساعدك في مكان تاني الدعم لانهيارك او تعبك ح يكون في مرحلة صديقك لسة ما وصل ليها. الشخص القوي لما يحزن او يتألم، بيحتاج الأقوى منه. الشخص المتفاءل اغلب الوقت، اما يزعل بيحتاج جرعة تفاؤل اكبر من اللي عنده. عشان كدا لما نمر بوقت صعب، لازم نعرف ح نمشي لمنو و ح نطلب المساعدة من منو. وكونوا انه الشخص الفلاني ما عنده الشعور X فدا ما بيعني اي شي، عادي جدا ممكن يكون عنده الشعور Y. لو عاينت حولينك حتلاقي في ناس مسخرة عشانك، في أسباب بتترتب في الطريق اللي بتختاره، عشان كدا لازم تركز في انك تختار طريق إيجابي، مهما كان الوضع الانت فيه، ومهما كانت حولينك نهايات قدر شنو كبيرة يظل طريقك هو طريقة تفكيرك ، في ظروف و في حاجات ما بنتحكم فيها، لكن تظل مشاعرك وطريقة تفكيرك حاجة تحت طوعك وإدارتك. متفاءلة بقدوم العام الجديد، و مقبلة عليه بكل حُب و مقدرة، و رغم بشاعة الملفات اللي قفلها لي العام دا، لكني مستعدة استقبل خيرات العلم الجديد و تفاصيله وسعاداته و تحدياته بإذن الله. اختار انك تتقدم، و اختار انك تقفل ملفاتك . اختار النهايات . لانه النهايات ضرورة للخطوة الجديدة.وتظل الحياة متوفرة للجميع و يظل العالم فيه خيار جميل. -اسراء_حيدر