Mohammad klup

ما زالت الكثيرات يشترطن في طلبات الزواج زوج بدون أولاد! كيف يكون سنك بدأ يكبر يا أختي وتطلبي زوج أعزب أو مطلق أو أرمل بدون أولاد؟ إيه المشكلة لو مطلق وعنده طفل أو أكثر عايشين مع أمهم وهو بيعطيهم نفقة؟ ما دام هيتزوج بعد طلاق زوجته أو وفاتها يبقى قادر يفتح بيت جديد وفي نفس الوقت مش هيقصر في حق أولاده؟ خايفة من إيه، خايفة يحن لأم الأولاد ويرجع لها لأي سبب؟ الأمر ده نادر حدوثه خصوصا في هذا الزمان اللي محدش فيه بيشتري حد مرة تانية لو باعه، كله بيشوف حاله ومحدش بيعمل خاطر لأي حاجة حتى الأولاد، إلا من رحم الله.. ولو حصل ورجع أم الأولاد وجمع بينكما، إيه المشكلة؟ محدش بياخد رزق حد، اثبتي وجودك واتقي الله وأحسني التبعل وخليكي في حالك ساعتها هيشيلك في عينيه ويقدرك وهتبقي أنتِ الأساس في حياته، هل جزاء الإحسان إلا الإحسان؟ خايفة من إيه؟ خايفة الأولاد يورثوا كل حاجة وأنتِ تطلعي من المولد بلا حمص؟ مش جايز أنتِ اللي تموتي قبله وهو اللي يورثك؟ ليه الأنانية وحب الذات؟ ليه بتخافوا من أقدار الله وبتقدروا اللبلاء قبل وقوعه، ده سوء ظن بالله، لا يضيع الله أجر من أحسن عملا، ولا يظلم ربك أحدا. لما يبقى سنك فوق الـ30 وتطلبي زوج بدون أولاد، زوج المفترض أن عمره هيكون أكبر من عمرك بسنوات كثيرة أو قليلة، جايز يكون عنده مشكلة في الإنجاب. ووارد تكوني إنتي اللي عندك مشكلة وما تخلفيش، ولما يكون هو عنده طفل أو طفلة تكون زي بنتك خصوصا لو أمها ماتت أو تركتها لأبيها وتزوجت؟ مين هيربي أولاد المسلمين لو كلكم رفضتم؟ هل كل رجل مطلق أو أرمل عنده أولاد عايشين معه هيسيب شغله ويقعد جنبهم؟ ياريت نبقى منطقيين وواقعيين وعندنا حسن ظن بالله اللطيف الخبير والقادر على كل شيء.