Fares.shah

طيب انا هنا من شهور عدت-- لاحظت ان البنات ماشاء الله عليهم بينقوا تنقية خيالية و عاوزين كل حاجة ١٠٠٪ الوسيم الكريم-- الميسور الغنى-- التقي الشقي-- الحنون اللي يدلع و يفسح و يسفر-- چان مان أميتاب تشان و احمد عز و ابو هشيمة كمان-- في ايه يا جدعان !!!! .. انا عاوز بنت حلال من اهل بيت طيب- ست بيت شاطرة- على قدر من الجمال- ناضجة- تقدر و تقدس الحياة الزوجية مش الخيالية ... والله المستعان. نصيحة-- لو هتعرفينا ان حضرتك بتحبي السهر و الخروج و التزحلق عالجليد و الشوبينج و الخ الخ- ياريت تكتبي تعرفى تعملى اكل ايه و مستوى اهتمامك بالنظافة اد ايه و شطارتك فى ادارة البيت واصلة لفين-الخ--- ... الرجالة عاوزة تستقر و ترتاح والله. حوار و دار بينى و بين الأخت ..... عنوان البروفايل: -العطاء و الحنان و القناعة و الحب والرحمة عنوان الانثى الحقيقية .. اللى هى أنا طبعا 😇- ----------- ----- ----------- أنا:مساء الخير حضرتك هى:مساء النور أ: اتشرف بحضرتك ه: مش تعرفنى بيك الاول أ: حاضر عبد الله ٤٠سنة اعزب ماتجوزتش قبل كدا عايش فى شقتى بحدايق حلوان و سيادتك؟ ه: شغال ايه ؟ أ: اخصائي تأهيل بدنى ه: يعنى ايه ومعاك شهادة ايه أ: حاضر واحدة واحدة اعرف عنك وتعرفى عنى ه: عاوز تعرف ايه أ: اسم حضرتك سنك ساكنة فين ه: وانتا عاوز تعرف ساكنة فين ليه!؟ أ: 😳 !!!!!!! ه: ماقولتش انتا شغال فين ؟ أ: شغال فى عيادة علاج طبيعى وتأهيل ه: طيب انا ساكنة مع اهلى فى كمبوند فى فيلا بالتجمع الخامس أ: كملى ه: وعندى ولد وبنت هيعيشوا معايا أ: مفيش مشكلة بالنسبالى لكن ان حصل نصيب ان شاء الله هنعيش فى شقتى مش مع اهلك ه: طبعا وانتا عاوز تعيش عند اهلى ؟ أ: لا خالص انا بقول بس لانى افتكرتك بتقولى انكم فى فيلا وكمبوند يعنى مش عايزة تبعدى عنهم ه: حصل خير أ: خير خير ه: وفين شقتك أ: قلت لحضرتك فى حدايق حلوان ه: انا مش هسكن فى مكان شعبي و الشغل دا أ: 🤔 لأ دى عالكورنيش يعنى مكان راقى ومناسب ه: بس انا مش ناوية ابعد عن المكان اللى عيشت فيه و ابعد عن اهلى- فياريت تشوف حاجة قريبة مننا أ: لكن شقتى دى تمليك ومشطبها على مزاج و تكلفة كبيرة والبيع مش بالسهولة دى ولا شرا شقة جديدة و وقت ورحلة بحث- ممكن فى وقت بعد الزواج ان شاء الله ه: عاوزة اسألك سؤال أ: اكيد اتفضلى اسالى براحتك ه: انتا عايزنى اشتغل بعد الجواز أ: الصراحة لأ ماحبش مراتى تتعب وتتبهدل فى شغل ومواصلات و ارهاق برا البيت وجوا البيت ه: جوا البيت ازاى؟! أ: يعنى شغل البيت يعنى ه: هو انتا زى بقية الرجالة مش هتساعدنى فى شغل البيت؟! أ: ماهو سيادتك انا هكون راجع من الشغل مرهق وطالع عينى- ثم انى مابعرفش اعمل لنفسي شاى حتى- وبعدين شغل البيت زى ايه قوليلى واساعدك ه: يعنى انا جاية اشتغلك! دا انتا عاوز خدامة ولا شغالة بقى! أ: 😒 ه: انتا كريم ولا بخيل؟ أ: الحمد لله مش بخيل و ايدى فرطة لكن بفرق بين الكرم و التبذير لانى شخص مسئول و الجواز مسئولية ه: يعنى ولادى محتاجة انقلهم لمدرسة انترناشيونال هتحرمهم ولا هتحتويهم- بس علشان ابقى فاهمة 🤨 أ: مين 🧐 هو النفقة عالاولاد العادية للحياة اليومية لبس اكل رعاية مفيش مشكلة لكن الحاجات الكبيرة دى مش والدهم بيهتم بيها؟ ه: اه باخد نفقة من طليقى و حاططلهم وديعة باسمهم فى البنك لكن احنا هنكون مسؤلين منك أ: 😳 !!!!!! ....... ....... ه: مابتردش ليه؟ أ: موجود اهو ه: الو.. فينك أ: مفيش بفكر بس ه: فى ايه أ: اصل ولادك مع مصاريف ولادنا حسبتها هتبقى ازاى ه: ولادنا ايه؟ انتا مخلف وعندك ولاد؟ أ: لا مفيش ولاد انا لسة اعزب اقصد ولادى منك بعد كدا ه: لأ مانا مش ناوية اخلف أ: 🥺 !!!! ه: بقولك.. بتحب الفسح والخروج والشوبينج والسفر ولا روتينى وتقليدى و عجوز فى نفسك كدا؟ أ: بحبه طبعا وبحب آكل من ايد مراتى- صحيح هو حضرتك بتعرفى تعملى اكل ايه🥹 ه: بعرف اعمل كل حاجة أ: 🥳 زى ايه ه: ماتقلقش هيطلعلك كرش وخليها مفاجأة أ: 🙄 طيب ممكن اشوف صورتك؟ ه: هو ماشوفتش فى بياناتى انى ماببعتش صور ولا واتس و اللى عاوزنى يتفضل في بيت اهلى؟ ولا انتا منهم و مش جد ؟ وعامة اطمن انا حلوة و رشيقة و شبه كندا علوش💃 أ: طيب ايه المطلوب حضرتك ه: العادى يعنى بتاع اى واحدة هتتجوز شبكة و مهر و عفش كامل وهدية الجواز أ: 😟 هدية ايه ه: احنا فى عيلتنا ممكن تجيب عربية او شقة انتا و ذوقك أ: 🤯😤 🤬 ممكن اسالك سؤال يا مدام؟ بس حطى نفسك مكانى لو هتتقدمى لواحدة ماشوفتهاش- ومعاها طفلين- ومش عاوزة تخلف منى- والمفروض انك هاى سوبر كلاس وانا لا يعنينى ايا من كل دا- كل اللى طالبه زوجة وبينا سكن ورحمة و مودة وتفاهم وكل واحد فاهم الدور اللى عليه ليه تشيلينى هم الكمبوند وانا مش هقعد فيه- ولا عاوز اشوفه اساسا وهم العيال وهم شغل البيت وهم الهدية وهم الجيران-- ل