أنا محتاجة انسان-- ، 31 عاما من مصر أبحث عن زوج و رقمي في مودة هو 5874309

عضوية مميزة

السكن و الحالة الإجتماعية

أنا واحدة عارفة كويس هي مين ورايحة على فين... هادية، راقية، من بيت محترم، ومتربية على إن الاحترام مش مجرد كلمة، لكن أسلوب حياة. طموحة وناجحة، بس عمر النجاح ما خدني من إنِّي أكون بنت أصول، قلبها طيب، وعقلها صاحي. مش بدوّر على تجربة، ولا على قصة تمشي وما تكملش... أنا بدوّر على علاقة تبدأ باحترام، وتكمل بمودة وسُترة. علشان كده أحب أوضح من الأول: التواصل عندي مش مفتوح ولا عشوائي، مافيش مكالمات ولا دردشات خارج الإطار، لو في قبول، يبقى في رؤية شرعية وبشكل رسمي ومحترم من البداية. ولو حضرتك شايف غير كده، بكل احترام… يمكن مش هنكون مناسبين لبعض. أنا مؤمنة إن اللي ليا ربنا هيجيبهولي، واللي يستاهل قلبي وعقلي… هيشوفهم زي ما هم، من غير تمثيل ولا مجاملات.

أنا مش بدوّر على قصة حب أفلام... ولا بفتش على "حد يسلّي وقتي"... أنا بدوّر على راجل بجد. راجل بمعنى الكلمة: متربي، ابن ناس، محترم، سنه ما يعديش ٣٥، شكله مقبول، شخصيته حلوة، خفيف الروح، أعزب، عمره ما ارتبط ولا اتلعب بيه ولا بيلعب. متدين من غير تشدد، فاهم يعني إيه جواز - حياة كاملة، مش سرير ولا واجب اجتماعي. وفاهم إن الرجولة مسئولية قبل ما تكون لقب. أنا مش طالبة لا عبد ولا سيد، مش طالبة انبهار ولا استعراض، أنا عايزة شريك للحياة، مش دور في مسرحية. لو إنت شايف الجواز ميثاق غليظ، وبتدور على علاقة جدّ، نضج، مشاركة، فأهلًا وسهلًا. لكن لو إنت هنا علشان تضيع وقت، أو تجرب، أو تكتشف نفسك... فمن البداية كده: وفر وقتك ومجهودك. ده مش المكان الصح. ملحوظة: هنا مش برنامج علاج نفسي، ولا مساحة صحوبية طويلة ومشاعر معلّقة. الموضوع واضح: تعارف محترم بهدف ارتباط رسمي... والباقي عند ربنا