ِHallim

زوجتي المستقبليه - أنا واحد مهتم بالماركتينج والسينما والقراية والرياضة و السفر .. إذن أنا مش هجيب نيش - ولا هجيب سفرة - ولا هجيب أطقم صيني تطلع للضيوف - مش هجيب دولاب طول بعرض - مش هيبقي عندنا أوضة للضيوف - مش هيبقي عندنا أنتريه "للضيوف برده ! إحنا هيبقي عندنا مطبخ و أوضة نوم وحمام وصاله .. هيبقي عندنا Work Space فيه مكتبه و ترابيزتين و 4 كراسي ملونين عشان نقرأ أو نذاكر فيهم .. وفلوس الأطباق هنجيب كتب و كرسي معلق ! هيبقي عندنا أوضة فاضية تماما فيها بروجكتور و لاب توب وبين باج عشان نتفرج علي أفلام ونتناقش فيها .. هيبقي عندنا أوضة للجيم - فيها مشاية وعجله و عقله وكام بار علي كام دامبل و فيها شاشة لفيديوهات التمرين .. وبفلوس الدولاب الضخم و الأنتريه هنجيب الأجهزة دي انا مش هجيب نقاشين و أدفع دم قلبي فيهم أنا هبيض الشقه أبيض و أجيب شباب بيعرفوا يرسموا دودلز وماندالا يلونوا الشقه بنص الثمن .. انا مش هجيب هدايا في عيد ميلادك دهب .. بس ممكن نطلع سفريه لدهب نتكحرت فيها سوا ونجرب حياة جديده كل مرة .. شهر العسل مش هيبقي فاره و في فندق خمس نجوم شهر العسل هيبقي في بلد غريبة نروح نجرب فيها كل حاجه و نبات في أماكن مختلفه و نجرب حاجات أكتر .. معلش لو تقلت عليكي - بس أنا مش تقليدي - و يستحسن تشجعيني علي ده ^^ أراكي حينما يأذن الله -3 -- ممكن حد ميحبش الكلام ده و يحب يكون بشكل مختلف كل واحد أكيد حر يختار بيته بالشكل اللي يحبه و يبسطه - ده مجرد شيء أنا عايزه لأنه يتناسب معايا و أكيد مع شريكة حياتي ومش شرط نبتدي حياتنا بكل اللي أنا كاتبه ممكن نصه أو ربعه حتي و نزوده مع الوقت سوا -- محدش يعيش حياه مش عايزها وهو قدامه الإختيار و الأهل مش عائق طول ما الإثنين عايزين ومصرين ^^ --نصيحه بعد 3000 كومنت وشويه فيهم الحلو والوحش - متتريقش علي حلم حد عشان محدش يدوس علي حلمك لأنها دايره ^^