OldSchoolIn

لو هتكلم عن نفسي فأنا غالبا مزيج غريب شوية بين راجل old school في حاجات كتير وطفل كبير لسه ممكن يضحك على حاجة تافهة لمدة عشر دقايق 😂 أنا أب وعندي بنتي وهي جزء مهم جدا من حياتي ودي مش معلومة مخبيها ولا مفاجأة هتظهر في الحلقة السابعة 😄 الأبوة غيرت فيا حاجات كتير وعلمتني إن المسؤولية مش كلام وإن الحنية مش ضعف وإن أحيانا أبسط التفاصيل هي اللي بتفضل في الذاكرة أكتر من أي حاجة كبيرة بشتغل في مجال إدارة وتصنيع الأغذية وشغلي واخد جزء محترم من يومي لكن بحاول دايما أفتكر إن الشغل جزء من الحياة مش الحياة كلها عندي شقتي وعربيتي وحياتي مستقرة والحمد لله لكن دي بالنسبة لي مجرد تفاصيل تساعد الإنسان يعيش مش حاجات تعرف قيمته لأن في الآخر اللي بيفضل فعلا هو الأصل والأخلاق وطريقة الإنسان في معاملة الناس بحب العيلة واللمة والكلام اللي له معنى وبقدر جدا الاحترام والكلمة اللي تتقال وتتعمل وفي نفس الوقت بحب السفر والخروج والتجارب الجديدة والأكل طبعا ودي بحكم الشغل وبحكم إيماني الراسخ إن تجربة مطعم جديد تعتبر نشاط ثقافي لا يقل أهمية عن زيارة المتاحف وأرفض أي محاولة علمية لإثبات عكس ذلك 😂 بعرف أتكلم وبحب أسمع وبحب النقاشات اللي ممكن تبدأ من حاجة بسيطة وتلاقينا بعد ساعتين بنتكلم عن الحياة والدين والنفس البشرية وبعدها بخمس دقايق ندخل في قضية مصيرية زي ليه البطاطس اللي في طبق الشخص اللي قدامك دايما طعمها أحلى من اللي في طبقك 😂 قريب من ربنا وبحاول أكون أحسن ومش بادعي المثالية عندي عيوبي وأخطائي زي أي إنسان وبغلط وبراجع نفسي وبعتذر لما أكتشف إني غلطان لأن بالنسبة لي النضج مش إنك متغلطش النضج إنك متخليش غرورك يمنعك تصلح غلطك دخلت هنا أساسا بناء على نصيحة ناس قالولي جرب يمكن ربنا يكتب لك نصيب فقلت نجرب ونتوكل على الله 😄 لكن عندي مبدأ مهم جدا أنا لا أبحث عن إنسانة بلا ماض ولا أطلب منها أن تتجاهل ماضي كل واحد فينا كل واحد وصل للمرحلة دي من حياته ومعاه قصة وتجارب علمته وغيرت فيه وأنا أحترم ده لكن أتمنى إننا ندي بعض فرصة عادلة أنا مش هحاسبك على شخص كان قبلي ومتمنيش إنك تحاسبيني على شخص كان قبلك أنا مسؤول عن كلامي وأفعالي وطريقتي معاكي فاحكمي عليا من اللي تشوفيه مني مش من اللي عمله شخص أنا أصلا معرفوش وأنا هعمل معاكي نفس الشيء ومادام بنتكلم عن الوضوح خليني أوضح الطريقة اللي أفضل إن التعارف يمشي بيها ممكن نتكلم هنا يومين مثلا ونشوف أصلا هل فيه قبول مبدئي وكلام مشترك ولا إحنا الاتنين بنحاول ننقذ محادثة ماتت إكلينيكيا من أول مساء 😂 وبعدها مكالمة أو اتنين أو ثلاثة ولو لقينا إن فيه ارتياح نتقابل لكن أول مقابلة بالنسبة لي تكون بره البيت في مكان محترم ومفتوح ومفيش عندي أي مشكلة نهائيا إن أهلك يكونوا موجودين كلهم لو ده يريحك بالعكس أهلا وسهلا بس أنا شخصيا مش بحب أدخل بيت ناس معرفهمش من أول مقابلة ولا أشوف إن ده ضروري قبل ما نعرف أصلا هل فيه قبول بيننا ولا لأ لو اتقابلنا وكان فيه قبول ورغبة حقيقية إننا نكمل ساعتها الخطوة اللي بعدها تبقى في البيت وأنا جاي بأهلي طبعا لأن من اللحظة دي الموضوع بقى له اتجاه واضح ومحترم يعني باختصار يومين كلام شوية مكالمات مقابلة محترمة ولو فيه نصيب ندخل البيوت من أبوابها لا محتاجين نتكلم ثلاثة شهور علشان نقرر نتقابل ولا محتاجين نحجز القاعة بعد الـ Hi مباشرة 😂 وفي الآخر خلينا صريحين التطبيق ده مهما حطينا له صور وقلوب وMatches وAlgorithms وأسماء إنجليزي فخمة هو في النهاية ماكينة جواز صالونات عملاقة بس بالواي فاي 😂😂 وأنا معنديش مشكلة مع ده أصلا لأن الطرق ممكن تتغير لكن الأصول الحلوة مش لازم تتغير أنا هنا مش علشان أقتل وقت ولا أجمع إعجابات أنا ببساطة مقتنع إن الحياة ممكن تكون كويسة جدا وإنت لوحدك لكن وجود الشخص الصح فيها ممكن يخلي حاجات عادية جدا يبقى ليها معنى مختلف مش بدور على حد يكملني ولا جاي أنقذ حد ولا محتاج حد ينقذني بدور على شريكة نعرف نكون على طبيعتنا مع بعض نضحك كتير ونتكلم بصراحة ونختلف من غير ما نجرح بعض ونسند بعض لما الدنيا تتقل ونبني بيت تكون فيه المودة والرحمة والسكينة أهم من مين كسب آخر خناقة وفي النهاية أنا مش داخل بقائمة مواصفات ولا متوقع إنسانة كاملة أنا بس أتمنى أقابل إنسانة نبص لبعض بعد فترة ونكتشف إن وسط كل الزحمة دي ربنا ساق كل واحد فينا للتاني في الوقت الصح وساعتها يمكن نقول الحمد لله إننا ادينا بعض فرصة