هند إبراهيم

" وما بكم من نعمة فمن الله". احنا ناس بسطاء جدآ ، سواء ف المأكل أو الملبس أو المسكن. بابا وماما شيخان كبيران ، بذلا ولا يزالان يبذلان معايا ومع اخويا الكثير والكثير. بابا تعليم متوسط ، معاش قوات مسلحة، وبعدها عمل لسنوات كفرد أمن. ماما تعليم دون المتوسط ، ربة منزل. أخى مهندس متزوج وعنده طفل صغنن، زى العسل اللهم بارك 🥰 ربنا اكرمنى بسلوك طريق تعلم وحفظ القرآن من أجازة ٢ كلية، ودا كان ليه التأثير الأكبر ف حياتى بعد كدا. لبست النقاب من آخر سنة ف الكلية ، وبعد التخرج أكملت طريقى ف حفظ القرآن مع تعلم ما تيسر لى من العلوم الشرعية ، وبعدها بسنوات ربنا أكرمنى بتعليم كتابه فى الدار ومن سنوات أونلاين . شخصيتى فيها جوانب كتير ، ممكن حاجات متناقضة ، بس كلها على بعض متميزة ومحبوبة. فيها العقل مع درجة من الجنان، الحنية، القوة مع الخضوع لولى الأمر ف المعروف. بحب الاستقرار و الروتينية مع بعض التجديد ، بحب النظام مع المرونة، حياتى أبدا مش ماشية بالساعة ، كل يوم حسب ظروفه. هادية ومطيعة بس جوايا فرسة جامحة ، مش اى حد يعرف يسيطر عليها. حساسة جداً ، بس مع درجة من المرونة النفسية . جوايا طفلة صغننة، محتاجة دفا وحنية ، وحواديت، ولعب وفرحة 😊 بحاول أتبع نظام حياة صحي . هينة لينة، بس تقديرى و كرامتى واحترامى لا أقبل المساس بهم ابدا، من أى حد ، تحت اى ظرف. اراعى حدودى مع الآخرين ، تقوى لرب العالمين ، وكذلك عندى خطوط حمرا كتير ، لا اسمح للآخر بالاقتراب منها فضلاً عن تجاوزها. مرحة ، بس عادي ممكن بمر بفترات اكتئاب . بحب الطبيعة ،النظام والنظافة - على وجه معتدل-. بحب الهدوء، وتزعجنى الاصوات العالية ، وكذلك الثرثرة وإضاعة الاوقات فيما لا يفيد. ربنا أكرمنى بعلو الهمة ، هدفى: " رضا الله و الفردوس الأعلى" ، وربنا كريم وقادر على كل شيء. دايما بحب آخد خطوة لقدام، سواء فى الدين أو الدنيا. بالنسبة للجانب الصحى: أجريت لى عملية لتقويم العمود الفقري ، وبعدها بسنوات أصبت ب٢ انزلاق غضروفي قطنى. الحمد لله ، بتحرك عادى واعمل شغل البيت ، لكن لا يناسبني حمل الاشياء الثقيلة. ظروفي الصحية ليس لها علاقة بالحمل والانجاب، بس اكيد سنى له علاقة 😊 بحب اللغة العربية جدا ، بس عادى بتكلم عامى، مع تسرب الفاظ من الفصحى فى سياق الحديث 😊. بالنسبة لشغل البيت : بشترك فيه مع بابا وماما ، لكن شراء احتياجات البيت بابا و أحيانا اخى بيقوموا بيها. بحب جدا قرارى ف البيت ، لا أكاد أخرج إلا لتمشية بسيطة وقتما تتيسر الظروف. صلتى طيبة بفضل الله ، مع الاهل والجيران ، والاخوات، بس التواصل ف الغالب اونلاين. طاقتى الجسدية ممكن تكون أقل من نساء أخريات اعتدن الشراء وشيل شغل البيت لوحدهم، بس ربنا عوضنى بطاقة عالية ف نواحى تانية كتير: روحانية،ونفسية وعاطفية ، وعقلية. بحب جدا الإدارة ، إدارة الموارد البشرية والمالية. نقطة السرعة في الأداء بشكل عام عندى ممكن تكون أقل من متوسط الناس، بس بيبقى تركيزى اكتر على الإحسان ف العمل. بحب الطبخ كهواية ، وخصوصا تجربة الوصفات الجديدة ، بس حاليا أكلنا ف البيت ف الغالب بسيط وتقليدى. ربنا أكرمنى بالزواج من رجل مرموق - دينيا ودنيويا- ، أحسبه على خير ولا ازكيه على رب العالمين. الزواج كان عقد فقط قبل البناء ، بس مكنش فيه نصيب للإستمرار وتم الفراق من فترة قريبة. قرار الفراق أخذه زوجي السابق وكنت متفقة معاه عقليا ،لأسباب عديدة ، اكترها كان عدم التوافق و وجود فجوة كبيرة بينا فى أمور عديدة فى الجوانب العملية للحياة ، بالإضافة لتغير فى ظروفه ، أدى إلى انى سأكون متحملة لمسئوليات كبيرة ، اكبر من قدرتى على التحمل، منها المشاركة في رعاية وتربية طفليه الصغيرين . ولهذا السبب بالذات كتبت بالاستفاضة عنى ، مع انى لا احب الحديث عن نفسي. نسأل الله أن يقدر لنا الخير حيث كان ثم يرضينا به.