سيف الدين 35

قبل ما تعرسوا ❤️ لازم تحكيوا على كل شيء ! موش كان الحب والمشاعر! لازم تحكيوا على الواقع كيفاش باش تعيشوا مع بعضكم ! كيفاش باش تتصرفوا في الشهاري! كيفاش باش تقسموا المسؤوليات والمصاريف من الأول ! حطوا كل حاجة على الطاولة باش ما يتبدلش الكلام بعد العرس ! احكيوا على أولوياتكم في الدار شنوّة المهم وشنوة الثانوي ! احكيوا على تربيتكم لأولادكم كيفاش تحبوا تزرعوا فيهم القيم موش كان على أساميهم ولا على لبستهم! إسألوا بعضكم لو جاء طفل مريض لا قدر الله ! زعمة عندكم الصبر والطاقة تتعاونوا ولا باش تبدى التهم واللوم بيناتكم ! احكيوا على ديونكم على القروض على الوضع المالي ! بصراحة خاطر برشة مشاكل تبدأ من غموض صغير في الفلوس ! احكيوا على العايلات وعلى العلاقات داخلها! على الحدود اللي لازم تتعمل بينكم وبينهم ! احكيوا على التفاصيل الصغيرة اللي تولي كبيرة كي تعيشوا مع بعضكم ! كيفاش باش تتصرفوا وقت تسافروا وين باش تخليوا الصغار ! وزعمة العدل تخليوهم في دار امك ولا أمه ! احكيوا على رمضان وين باش تعدّيوه وعلى العيد كيفاش باش توزعوا الوقت بين العايلتين ! احكيوا على العادات الصغيرة كيفاش تتعاملوا مع الشخير ! احكيوا بصراحة على الميولات الجنسية والاختلافات فيها خاطر السكات عليها يولد برشة حواجز بين الأزواج ! احكيوا على راحتكم النفسية وعلى عقدكم القديمة! على شنوّة يخوفكم وشنوة يفرحكم ! على المبادئ والقيم اللي تعيشوا بيها ! احكيوا على أصحابكم زعمة كل واحد باش يحافظ على دائرته الاجتماعية ولا باش تتبدل الحياة الكل ! احكيوا على الغيرة ! على الخصوصية! على الوقت الشخصي ! على شنوّة تستحقه باش ترتاح ! وشنوة ما تستحملوش! احكوا على طموحاتكم في الحياة ! وين تحبوا توصلوا مع بعضكم ! على الخدمة على السفر على الأولويات في المستقبل! احكيوا حتى على أبسط التفاصيل كيفاش باش تتقاسموا الخدمة في الدار ! شكون يهبط البوبال ! شكون يشري الحوايج ! شكون يبدل لمبة محروقة ! خاطر التفاصيل الصغيرة هي اللي تبني علاقة كبيرة💕 والصدق فيها هو اللي ينقذ برشة حب ❤️من الضياع ! العرس ما هوش صورة حلوة ولا صياغة متاع ذهب العرس حياة كاملة فيها مسؤولية وصبر وتفاهم واللي يعرف يحكي ويواجه ويخطط من الأول هو اللي يعرف يعيش من بعد احلى ايامات حياته …