Ashraf Elhosiny

انا بقالى ٤ شهور موجود هنا فى الموقع ده و للاسف .. لقيت كل الناس تفكيرهم واحد وهو التفكير المادى .. ملقيتش حد استفاد من تجربته السابقة وعاوز يعيش اللى باقى من العمر فى هدوء وحب وسعادة ملقيتش .. حد متصالح مع نفسه ومعترف بعيوبه وعاوز يصلحها عشان كده خليت اسم البروفايل -ملهمش فى الطيب- عشان لقيت ناس عمرهم تجاوز ٥٠ و لسه بيشترطوا .. وعاوزين مهر وشبكة ومؤخر وشقة تمليك............. الخ وتقولك ده شرع ربنا ناسيين ان الشرع كمان بيقول - ..... اذا جاءكم من ترضون دينه وخلقه فزوجوه - .... ، والمدهش كمان ان كلهم كاتبين نفس المواصفات - تحس انها ملاك نازل من السماء وانها جميلة وشكلها اصغر من سنها وست بيت شاطرة وبتكره النكد ............ ده على اساس ان الرجالة هما النكديين ، وممكن كمان تبقى مطلقة ومعاها اولادها وعاوزاه يربيهم ويصرف عليهم عشان ابوهم راميهم وكمان تشترط انه يكون اعزب وطويل ورياضى وعيونه خضراء وشعره اصفر وتقولك مفيش حد جاد بالزواج .. هو بالعقل كده لو انتى فيكى كل المواصفات دى جوزك ما اتمسكش بيكى وطلقك ليه ولو الراجل عنده الامكانيات دى كلها ... هيدور على السن ده ليه ؟ ولا ياخد واحدة بعيالها .... يعمل بيها وبيهم ايه ؟ بجد حاجه مستفزة وتغيظ ....، طيب ما انا اروح أختار لى عروسه حلوة وصغيرة ....... تدلعنى وأدلعها ونعيش ونعمل كل اللى نفسنا فيه ... أنا مش داخل عشان أقدم مواعظ أو أدعى المثالية بالعكس أنا مقتنع تماما إن أنا السبب فى فشل المرحلة السابقة وإن أنا اللى ضيعت سنين عمرى وشبابى بكل .. إرادتى ، لكن كمان مش لازم أبدا إنى أستمر فى الخطأ ... ده وإنى أفضل عايش على أطلال تأنيب الضمير...........، عشان كده أخدت قرار انى أعيش من جديد مع انسانة نكون عوض لبعض ومش عاوز اختار غلط مرة تانية عاوز بس اقول حاجه مهمه الزواج دلوقت زى شراء العربيات الناس عاوزة تشترى لكن سعرها غالى ومبالغ فيه عشان كده بتختار انها تطلب عربية أوبر علشان تروح مشاويرها وتوفر على نفسها المصاريف ده غير كمان التراخيص والغرامات والمرور وزحمة الطريق .. علشان كده فى ناس كتير مضطرة انهم يطلبوا أوبر وكمان هنروح مشاوايرنا فى عربيات حديثة ومكيفة والعربيات معروضة فى المعارض محدش بيشتريها. وحتى لو حد اشتراها ومعجبتوش هيستغنى عنها لأن كل شئ له ثمن بيبقى رخيص وسهل الإستغناء عنه مهما طال الوقت ومهما كان ثمنه غالى ......................... موضوع اوبر ده مجرد مثال عن الرجل المحترم اللى عاوز يعيش حياته مع شريكة تشاركه تفاصيل حياته ومش قادر عشان مجردشكليات ملهاش اى لزوم فى الزمن اللى احنا فيه دلوقت وبيضطر انه يغلط - الا ما رحم ربى - او انه يفكر فى طريق غير طريقه لمجرد انه يعيش حياته الطبيعية اللى ربنا خلقنا عليها بالفطرة أوبر هى الزواج العرفى والمسيار والحاجات الغريبة اللى بنشوفها ونسمع عنها اليومين دول وفى ناس كمان بتتجه اتجاهات تانية ربنا يعافينا منها وكل ده عشان ايه شوية شكليات مادية مش اكتر ويمكن يكون الشخص ده عنده من الامكانيات المعنوية ما يكفى الزوجة ويعوضها ويجعلها اسعد انسانة فى الدنيا ، عشان كده ياريت كلنا نتعلم من أخطائنا و نعيد النظر من جديد فى مقاييس إختياراتنا ونكون متصالحين مع نفسنا وعارفين كويس إحنا فين دلوقت وفى أى مرحلة لان كلما تقدم الانسان فى العمر يكتشف ان اهم شئ فى الحياة هو ستر وصحة وراحة بال مع شريك حياته ولأن كل واحد مننا خرج خسران كتير من تجربته السابقة سواء خسارة مادية أو معنوية وياريت بلاش نكون إحنا كمان حكام قاسيين وجلادين على بعض ونصعبها على نفسنا وكمان عيب أوى نكون لسه بنفكر أو لسه بنختار بنفس الأسلوب لأن أكيد مفيش حد فينا عاوز يختار غلط تانى ولا فى وقت لتجارب فاشلة تانى ....... والا يبقى مفيش داعى من إعادة التجربة .