Ashraf Elhosiny

انا بقالى ٥ شهور موجود هنا فى الموقع ده و للاسف .. لقيت كل الناس تفكيرهم واحد وهو التفكير المادى .. ملقيتش حد استفاد من تجربته السابقة وعاوز يعيش اللى باقى من العمر فى هدوء وحب وسعادة ملقيتش .. حد متصالح مع نفسه ومعترف بعيوبه وعاوز يصلحها عشان كده خليت اسم البروفايل -ملهمش فى الطيب- عشان لقيت ناس عمرهم تجاوز ٥٠ و لسه بيشترطوا .. وعاوزين مهر وشبكة ومؤخر وشقة تمليك............. الخ وتقولك ده شرع ربنا ناسيين ان الشرع كمان بيقول - ..... اذا جاءكم من ترضون دينه وخلقه فزوجوه - .... ، والمدهش كمان ان كلهم كاتبين نفس المواصفات - تحس انها ملاك نازل من السماء وانها جميلة وشكلها اصغر من سنها وست بيت شاطرة وبتكره النكد ............ ده على اساس ان الرجالة هما النكديين ، وممكن كمان تبقى مطلقة ومعاها اولادها وعاوزاه يربيهم ويصرف عليهم عشان ابوهم راميهم وكمان تشترط انه يكون اعزب وطويل ورياضى وعيونه خضراء وشعره اصفر وتقولك مفيش حد جاد بالزواج محدش فيهم اتكلم عن عيوب الزوجه اللى حذرنا الرسول من الزواج منها وللاسف شوفناها وعيشيناها مع الاسفنجة-المغرورة-الأنانية-المسترجلة-النكدية-ام بوز-اللى صوتهاعالى-العنيدة -البخيلة-الكذابة-المستفزة-الأنانة-المنانة-الحنانة-الشكاكة-الشكاية-البكاية-النمامة -بنت امها ... هو بالعقل كده لو انتى فيكى المواصفات دى جوزك ما اتمسكش بيكى وطلقك ليه ولو الراجل عنده الامكانيات دى هيدور على السن ده ليه ؟ ولا ياخد واحدة بعيالها يعمل بيها وبيهم ايه ؟ بجد حاجه مستفزة وتغيظ .... طيب ما انا اروح أختار عروسه حلوة وصغيرة تدلعنى وأدلعها ونعيش ونعمل كل اللى عاوزينه ونفسنا فيه أنا مش داخل عشان أقدم مواعظ أو أدعى المثالية بالعكس أنا مقتنع تماما إن أنا السبب فى فشل المرحلة السابقة وإن أنا اللى ضيعت سنين عمرى وشبابى بكل إرادتى لكن كمان مش لازم أبدا إنى أستمر فى الخطأ ده أو إنى أفضل عايش على أطلال تأنيب الضمير.............، عشان كده أخدت قرار انى أعيش من جديد مع انسانة نكون عوض لبعض ومش عاوز اختار غلط مرة تانية عاوز بس اقول حاجه مهمه الزواج دلوقت زى شراء العربيات ممكن تكون فاتحة خير عليه ويحافظ عليها ويهتم بيها وممكن تخليه يكره اليوم اللى عرفها فيه والناس عاوزين يشتروا لكن سعرها غالى ومبالغ فيه عشان كده بتختار انها تطلب عربية أوبر علشان تروح مشاويرها وتوفر على نفسها المصاريف ده غير كمان التراخيص والغرامات والمرور وزحمة الطريق .......... وكمان هنروح مشاوايرنا فى عربيات حديثة ومكيفة والعربيات معروضة فى المعارض محدش بيشتريها. وحتى لو حد اشتراها ومعجبتوش هيستغنى عنها لأن كل شئ له ثمن بيبقى رخيص وسهل الإستغناء عنه مهما طال الوقت ومهما كان ثمنه غالى ......................... لان اصعب بلاء للرجل هو الابتلاء فى زوجته اللى كان يظن انها هتكون له السكن والموده ويتفاجئ بأنه مجرد مصدر للتمويل والصرف فقط يمد يده بالعطاء ويقابل بالنكران والعناد والجدال مع نفس مريضة لا تقبل النقد او حتى المحاسبة ومطالب بتحمل النكد والفوضى فى زمن انقرض فيه الأنوثة واصبح العلاقة قائمة على اختبار صبر الرجل لا على المودة والرحمة موضوع اوبر ده مجرد مثال عن الرجل المحترم اللى عاوز يعيش حياته مع شريكة تشاركه تفاصيل حياته ومش قادر عشان شوية شكليات ملهاش اى لزوم فى الزمن اللى احنا فيه دلوقت وبيضطر انه يغلط او انه يفكر فى طريق غير طريقه عشان بس يستمتع بحياه طبيعية ربنا خلقنا عليها بالفطرة ومفيش غنى عنها أوبر هى الزواج العرفى والمسيار والحاجات الغريبة اللى بنشوفها وبنسمع عنها اليومين دول كل يوم ... ، ويمكن كمان يكون الشخص ده عنده من الامكانيات المعنوية ما يكفى الزوجة ويعوضها ويجعلها اسعد انسانة فى الدنيا تكون له السكن ويكون لها الحياة ، عشان كده ياريت كلنا نتعلم من أخطائنا و نعيد النظر من جديد فى مقاييس إختياراتنا ونكون متصالحين مع نفسنا وعارفين كويس إحنا فين دلوقت وفى أى مرحلة لان كلما تقدم الانسان فى العمر يكتشف ان اهم شئ فى الحياة هو الستر والصحة وراحة البال مع شريك حياته وكل واحد مننا خرج خسران كتير من تجربته السابقة سواء خسارة مادية أو معنوية يبقى بلاش نكون إحنا كمان حكام قاسيين وجلادين على بعض ونصعبها على نفسنا عشان عيب أوى نكون لسه بنفكر أو لسه بنختار بنفس الأسلوب ولأن أكيد مفيش حد فينا عاوز يختار غلط تانى ولا أصلا عندنا وقت نعيد تجارب فاشلة تانى والا يبقى مفيش داعى من إعادة التجربة .